Aurrekoan emazteagaz Baztan pelikulea ikustera joan nintzan
Vitoriako zinema batera, gogoz beteta ze bizi nazen ingurua bai fisikoki bai
istorioen bidez pelikulean jasota ikusteak halako zirrara berezia sortu eustan.
Ez nenbilen oker, behar egiten dodan institutotik hasi eta ezagutu nahi dodazan
Baztango txoko izkutuak be begien bistan
azaldu jatazan eta.
Pelikulea orain dala lau urte egiten hasi ziran, ni bailarara
ailegatu barik nengoala, eta errodatzen hasteko hainbat ikasleren bila joan
ziran Lekaroz Institutora. Kastina arrakastatsua izan zan, dudarik barik, ze
gero protagonista ez profesionalen
artean institutoko neska-mutil bi eta
Historia irakaslea aukeratuak izan ziren. Neska
gaztea Jone Lizarzaburu, nire ikaslea izan zan batxilergoko bigarren mailan,
eta bapatean aktoresa lanetan hainbesteko profesionaltasunez ikusteak izugarri poztu ninduan.
Elizondon kanpotarra izanda be, Baztango hainbeste ezagun ikusteak emozionatu ninduan, eta hori azaltzen ziran adineko gehienekin ez dodala inoiz harremanik izan. Esate baterako, argazkilari beharretan agertzen dan aitona pelikulea ikusi genduan astean bertan zendu zan. Bere familiakoentzat sekulako errekordu ona izan behar da etxeko aita bere beharrean hain tentu handiz ikustea herriko historia, jendea, izaera azken batean, fotografiaten. Zalantzarik barik pelikulean bailarakoen hartu-emona da historiaren ardatza, gaur eguneko errealitatetik abiatuz agoteen historia kontautea antzinakoaz gogoeta egin dagigun.
Pelikulea korala izanik, aspaldiko errealitateak gaurkotasuna
berreskuratzen dau herritarrek aktoreen
laguntzaz hartzen daben protagonismoari esker. Denek aktore beharretan desdoblatzen
dira gaurko izaera interpretazinoaren
bidez antzinean izan ahal zirenagaz lotuz, horrexegatik daukagu bi pertsonaia aktore
bakarrean. Historia borobilduz pelikuleak gaur egungo bizimodua eta antzinakoa lotzen dauz, hasieran adineko
arotzak zurezko arkoia ibaian topauten
dau gero amaieran agote zaharraren arkoi berak pelikulea zarratzeko.
Baztan ibaiako uraren joan etorrian azaltzen da barriro be arkoi zaharra, agoteen
historia daroana, lamien batek azaleratuko ete eban? Batek daki, ze bailarako
erreketan lamiak egon badira, pelikulean azaltzen dan lez.
Bi plano ditugu, batetik oraina, gaur egungo bizimodua erakusten
deuskuna, atobuz hilara luzea institutik
irteten pelikulako planorik ederrenetarikoa da, eta antzinakoa, inkisidorearen
bisitaz Bozateko auzokideen esklabutza krudela agerian lagaten dauana. Gauak eguna dakar, eta hogeita lau orduka
kontatzen doguz asteko egunak, motibo batek lotu lezake istoria eta halan
gertatzen da arkagaz, eta ez dakit ze neurrian herri proiektu hau erredenzio beharra dan. Bailarakoek
naturaltasunez, alkarren arteko beharragaz, euren historiako pasarte ilunena
antzezten dabe pelikulean, gaur egun beste egora bat bizi dala baztandarren
artean erakutsiz. Argi dago antzinako
krudelkeriak mendeetan iraun dauala, pelikulan azaltzen dan eskultore agoteak
horixe zalatzen dau, eurak umeak zirela eskolara sartzean harrika hartzen ebezala, oraindik
orbainak min emoten deutse agotei. Beharbada
arte lan honek munduari erakutsi nahi izan deutsa pelikulako arkoiak bere
garaian azaldu ezin izan ebana: agoteek sufridutako krudelkeria, azken batean eginiko gaiztakeriak onartzeak ziurtatu lezake barriro ez dirala errepetiduko.
Arka zaharra, pelikulea lez memoriaren azalean doa hondoratu barik, ahal dan neurrian kaltetuen akorduak bakea lor dagian, bitartean umeek ibaiko lamien kontuez lo hartzen dabe, lana
sarritan apostu bihurtzen da eta aiton amonek herritar aktoreak arropa dotorez jantzi eta erretrataten dabie.
Eguneroko bizimodua aurrera doa, eta bailarako magia baztandar bakoitzaren gogoan bizten da, gauean atariko argia bizten jakon lez ezezagunari, pelikula
ikusleari, ongi etorria emateko.
Comentarios
Publicar un comentario